សម្តេចក្រុមព្រះ ធ្វើសន្និសីទសារព័ត៌មាន

នៅព្រឹកថ្ងៃទី១៩ ខែមិថុនា ឆ្នាំ២០១២ សម្តេចក្រុមព្រះ នរោត្តម រណឫទ្ធិ ព្រះប្រធាន គណបក្សនរោត្តម រណឫទ្ធិ បានធ្វើសន្និសីទសារព័ត៌មាន នាព្រះតំណាក់ទន្លេបាសាក់ ខ័ណ្ឌ ចំការមន រាធានីភ្នំពេញ ដើម្បីឆ្លើយតបទៅនឹង សេចក្តីប្រកាសផ្អាកការចង់សម្ព័ន្ធភាព របស់លោក ញឹក ប៊ុនឆៃ រវាងគណបក្សនរោត្តម រណឫទ្ធិ និង គណបក្សហ្វុនស៊ិនប៉ិច ដែលបានចុះកិច្ចព្រមព្រៀង កាលពីថ្ងៃទី២៤ ខែឧសភា ឆ្នាំ២០១២ នៅវិមានសន្តិភាព ដោយមានការសម្រុះសម្រួលពីសម្តេច នាយករដ្ឋមន្រ្តី ។ សម្តេចក្រមព្រះ បានមានព្រះបន្ទូល ថា ការប្រកាសផ្អាកដំណើរការរួបរួមគណបក្សទាំងពីរ គឺជាការសម្រេចចិត្តជាឯកតោភាគី របស់លោក ញឹក ប៊ុនឆៃ ដោយពុំមានការពិភាក្សា ជាមួយព្រះអង្គឡើយ ។ ព្រះអង្គបាន បញ្ជាក់បន្ថែមថា នេះគឺជាចេតនារបស់ លោក ញឹក ប៊ុនឆៃ ចង់បំបែកបំបាក់កំលាំង អ្នករាជានិយម និងពុំបានគិតដល់ផលប្រយោជន៍ជាតិ ។ ចំពោះគណបក្សនរោត្តម រណឫទ្ធិ ក្នុងនាមព្រះអង្គជាព្រះប្រធាន បានតម្កល់ផល ប្រយោជន៍ជាតិជាធំ ប្រកាន់យកគោល នយោបាយបង្រួបបង្រួម ចូលរួមកសាងជាតិជាមួយ គណបក្សប្រជាជនកម្ពុជា និងពុំមាន ចេតនាណាមួយទៅចូលរួមជាមួយគណបក្ស ប្រឆាំង ដូចការចោទប្រកាន់របស់លោក ញឹក ប៊ុនឆៃ នោះឡើយ។ ជាពិសេស ព្រះអង្គធ្វើទៅតាមព្រះរាជតម្រិះរបស់សម្តេតា សម្តេច តាទួត។ ព្រះអង្គក៏បានអំពាវនាវ ដល់សមាជិកសមាជិក គណបក្ស ហ្វុនស៊ិនប៉ិច ឈប់ដើរតាមលោក ញឹក ប៊ុនឆៃ វិលមកចូលរួមជាមួយគណបក្សនរោត្តម រណឫទ្ធិ វិញ ព្រះអង្គនឹងបើទ្វារចំហរជានិច្ច។