សម្តេចក្រុមព្រះ នរោត្តម រណឫទ្ធិ យាងចូលរួមជាព្រះអធិបតីក្នុងពិធីបុណ្យផ្កាសាមគ្គី នៅខេត្តកំពង់ចាម  ​

សម្តេចក្រុមព្រះ នរោត្តម រណឫទ្ធិ ព្រះប្រធាន​គណបក្ស នរោត្តម រណឫទ្ធិ បាន​យាង​ចូលរួមជា ព្រះអធិបតី ក្នុងពិធីបុណ្យផ្កាសាមគ្គី នៅវត្តទ្រាន ឃុំទ្រាន ស្រុកកំពង់សៀម ខេត្តកំពង់ចាម នាព្រឹកថ្ងៃទី២៥ ខែឧសភា ឆ្នាំ២០១២ ដោយមានការអមព្រះដំណើរដោយ ឯកឧត្តម ជាព្រឹទ្ធបុរស និងអគ្គលេខាធិការ ព្រមទាំងសហជីវិនជាអគ្គលេខាធិការរង និងប្រធានក្រុមការងារ បោះឆ្នោត ជាច្រើនរូបទៀត ។  
នាឱកាសនោះ សម្តេចក្រុមព្រះ បានមានព្រះបន្ទូល​ទៅកាន់ បងប្អូនប្រជាពលរដ្ឋដែលបាន ចូលរួមក្នុងពិធីនោះប្រមាណជាជាងមួយពាន់នាក់ អំពីគុណដ៏ថ្លៃថ្លារបស់ សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា​ ដែលបានបង្រួបបង្រួមគណបក្ស រាជានិយមដែលបានបែកបាក់គ្នាអស់រយៈពេល ៥ឆ្នាំមកហើយ ជាពិសេស​ការប្រមែរប្រមូល អ្នករាជានិយម អ្នកសីហនុនិយម ដើម្បីជួយកសាង និងអភិវឌ្ឍជាតិ ។
សម្តេចក្រុមព្រះ បានមានព្រះបន្ទូលបន្តថា យើងត្រូវបង្កើគណបក្សរាជានិយមមួយ ពិតប្រាកដ ដែលពុំមានការបែកបាក់គ្នាតទៅទៀត ហើយត្រូវចេះជួយគ្នាទៅវិញទៅមក រវាងអ្នកគាំទ្រ គណបក្សនរោត្តម រណឫទ្ធិ និងអ្នកគាំទ្រគណបក្សហ្វុនស៊ិនប៉ិច នៅពេលបោះឆ្នោត​ក្រុមប្រឹក្សា​ឃុំ​សង្កាត់ខាងមុខនេះ ។ មានន័យថា  ប្រសិនបើឃុំណា គណបក្សនរោត្តម រណឫទ្ធិ ខ្លាំង គឺសមាជិកសមាជិការគណបក្សហ្វុនស៊ិនប៉ិច ត្រូវប្រមែរប្រមូលគ្នាបោះឆ្នោតជូនគណបក្ស នរោត្តម រណឫទ្ធិ ប៉ុន្តែប្រសិនបើឃុំ-សង្កាត់ ណាគណបក្សហ្វុនស៊ិនប៉ិច ខ្លាំងសមាជិកសមាជិការ គណបក្សនរោត្តម រណឫទ្ធិ ត្រូវប្រមែរប្រមូលគ្នាបោះឆ្នោតជូនគណបក្សវុនស៊ិនប៉ិច វិញ។
សម្តេចក្រុមព្រះ បានមានព្រះបន្ទូលបញ្ចាក់ថា ក្រោយពេលបោះឆ្នោតក្រុមប្រឹក្សាឃុំ-សង្កាត់ រួច ព្រះអង្គនឹងគង់ជាព្រះប្រធានគណបក្សហ្វុនស៊ិនប៉ិច ៕​ by SKP.IT

​